Мен және менің мамандығым
Эссе
«Адам жанын түсіне білу, оны зерттей білу- үлкен өнер»
З.Фрейд.
«Мен бір жұмбақ адаммын» оны да ойла – деп Ұлы Абай атамыз айтқандай, әрбір тұлға – жұмбақ. Сол жұмбақтың кілтін тауып, жүрек кілтін аша білу, әрбір жүректің құпия сырын оқи білу мен қалаған мамандықтың ғажайып тылсым сыры.
Адам өзінің болашақ кәсібіне әр түрлі жолдармен келеді.Мамандықты тандау үшін, ең алдымен өзін, өз бейімділігін тану қажет.
«Еңбегіңнің ел кәдесіне жарағанын сезіну – үлкен бақыт…» екені даусыз. Қазіргі уақытта жас жеткіншектерге білім беру мен қатар олардың мынау өмірге бейімделіп, осынау өмірден өз жолын таба білуіне көмек беру үшін, қазіргі заманға сай мамандықтың қажет екені ақиқат.
Бұл қандай мамандық ? Болашақта қандай мамандықты таңдасам? Осы бір сұрақ өмірге келіп, сана-сезімі жетілген әрбір адамды толғандырары сөзсіз. Бір кездері мен де, осы бір сұрақтың жетегінде көп ойланып, толғанып, қиялдап, өзім қалайтын, өзім сүйіп айналысатын істі таңдау жетегінде жүрдім. Ақырында осы бір сұраққа жауап та таптым. Ол әлем – психология әлемі – жан туралы ғылым .
Мен таңдаған мамандық психолог.Психолог-басқа адамның мәселесіне еніп, түсіне отырып, өзі бірақ бұдан зардап шекпейтін мықты тұлға. Өз өмірін тәжірбие ретінде қолданбайтын, әр нәрсеге обьективті түрде қарай алатын, өзгелермен бірге қуана да, қайғыра да алатын терең эмоционалды жан. Қазір мен мектепте психолог бола жүріп, әрбір күн сайын, кездесетін қиыншылықтар мен проблемаларымен бетпе-бет кездесіп өз білімімді шыңдау, іздену үстіндемін.
Көгілдір экранды жаулаған шетелдік фильмдер, түрлі діни бірлестіктер, ұялы телефондағы музыкалар, құлаққа таққан құлаққаптар осының бәрі жастардың санасын улап жатқаны жасырын емес. Осылардың бәрі жастардың көңіл – күйіне, психикасына әсер етуде. Міне, осындай жас буын жеткіншектердің жүрегіне үңіліп, олардың сырлас досы, қиналғанда қол ұшын беретін жанашыры болатын мамандықтың иесі болу менің арманым еді. Арманның жетегіне еніп, мен «психолог» деп аталатын мамандықты таптым.
Адам болып жаралған соң тірлікте
Мақсат қойып оған жету ерлік те
Бала күннен армандаған кәсібім
Кім біледі қолым жеткен бақыт па
Салмағы көп әлде ауыр бұл жүк пе?
Иә,қай мамандықтың да өзіндік қызығы мен қиындығы бар.Ал менің таңдауым жеке тұлғаның жас ерекшелігін ескере отырып, олардың жан –жақты сырын ашу.
Жеткіншектердің өмірге еш қорқынышсыз, зұлымдықсыз қарап, алдарында ғажап бір әлемнің есігі ашылып, ашық та жарқын күндер күтетініне сендірсем деген үміт мені жетелеп осы мамандыққа бейімдеді. Мен балалардың психологиясын зерттей келе өзім де солар мен қатар дамып келе жатқандаймын. Қазақстанның болашағы – жас ұрпақ десек, олардың еш алаңсыз жеке тұлға болып қалыптасуы үшін менің де өзіндік қолтаңбам болса деймін.
Ең алдымен адамның ішкі жан дүниесін зерттейтін ғажап мамандығым арқылы жабырқаған көңілге қуаныш сыйлап, олардың жүрек түкпірінде жатқан бүкпесіз сырларын тыңдап, болашағына сеніммен қарауға жетелегім келеді.
Психологиялық жұмыстар жүргізу барысында мен әр баланың жүрек түпкірінде жатқан сезімдеріне үңілуге тырысамын. Солардың көздеріндегі мұңды сейілтуге, көңілдеріндегі қуаныштарын тарқатуға, оқушымен қасындағы құрбыларындай, бірінің әпкесі, бірінің анасы, бірінің ұстазы, бірінің аралас досындай бола білуге жұмыстанамын. Бұл еңбегім менің текке кетпеді. Мен еңбек еткен аз уақыт аралығында өз шәкірттерімнің жүректерінен өзіндік орын алғандаймын деп есептеймін.
Әрине бұл мен таңдаған мамандығымның жемісі десе болғандай. Мен өз мамандығымның халыққа қажет екенін сезінгенде, бұл мамандықты текке таңдамағанымариза боламын.
Әр жастағы баланың даму ерекшеліктеріне сай келетін, тәрбиенің тиімді әдісін таба білу, бала мен тіл табыса білу шеберлігі, оқушының сеніміне бөлену, ұйымдастырушылық қабілеттерін қалыптастыру мақсатында өз тәжірибемде одан әрі жандандырып, әріптестеріме көмегімді тигізсем деймін.
Мейірімге толсын бар құшақ,
Жақсы істер жайып желісін.
Ұрпақты дұрыс баулысақ,
Тәрбие берер жемісін…
Мен өз мамандығымды қоғамға қажеттілігін сезіне отырып, ерекше жақсы көрем және жақсы психолог болу үшін барлық ерік –жігерімді сарп етуге әзірмін.
Мен шәкірттерімді қолдай отырып, жан жылуымды шәкірттеріме сыйлауды өзімнің ұстаздық парызым деп санаймын.
Менің мамандығым –ғажап мамандық!
)
)
)
